飛魚婚紗~幸福旅程規劃進行式
如果婚紗相可以影到好似故事書, 應該都幾得意哦!!
無意中係台灣新娘秘書既網頁上搵到一d關於婚紗照公司既評語, 其中一間可以突圍而出, 仲要係台南市呢d比較 "新界" 既地方既公司, 佢的確係幾吸引人架, 因為佢地既情景模式拍照方式, 令到整輯相集好生動, 好有想像空間, 直頭好似投入了當時既情景. 如果拍攝追求, 拍拖, 求婚, 以至結婚的過程, 真的好像現場一樣. 香港既婚紗相公司真的望塵莫及.
然而, 唔知係唔係 "新界"公司既關係, 婚紗既款式就真的有點鄉土味, 除非自帶禮服, 如果全部都著佢地提供的話, 好能選擇比較少, 但如果喜歡大自然, causal look既感覺, 好估應該係佢地杯茶, 因為真係有種講唔出既舒服!!~~
蝴蝶樹, 因為之前有表姐影過的關係, 對佢地都係有好感架, 而且可以一日之內去到晒我想去既地方......遊樂場, 海, 花啦, 好多好多, 但唔係台北影就唔可以唔方便啦. 表姐話佢影個時係可以全部底片攞番, 但宜家睇佢地個網, 好似無左啦, 咁仲抵唔抵呢?? 佢話全部使費連機票+酒店共用左2萬幾3萬蚊, 基本要有既相架呀(油畫架), 相簿呀(2本), 謝卡呀, 全部都有. 但最大問題係宜家無左全部相底囉!! 咁公平d講, 其他公司都係無全部相底, 但硬係覺得無咁抵, 個心點都有d唔舒服囉!!
我最想影旋轉木馬呀, 我覺得會好開心架, 因為遊樂埸係一個沒有煩惱, 只有歡樂既地方, 而且呢種歡樂係一定發自內心, 開心係應該要笑~~表姐就係有影到啦!!
比d sample你地睇下, 我係網上搵架:
今日終於加入左masalili大家庭, 做左member. 其實加入得, 都預左9成會join佢, 仲有時間, 婚紗列車未到站, 可以同佢地傾下, 問下資料先都得啫!!
我個網路客服係yvonne呀, 佢好nice架!! 一開始就比好多問題佢答, 遲d整理好post比大家睇~~ (但請先加入BLOG友並說明, 因有關內容設定為私有化)
搵左2日資料, 其實都唔只2日, 只係之前靜靜雞都會去search下, 羨慕下咁啦, 宜家就真係睇完仲有得揀啦, 睇左好多攝影公司, 有以下shortlist左:
台北代表
1. 台北藏愛婚紗 (價錢: HK$16000-18000左右, 大約有80張相)
Comment: 朋友影過, 好cute的主題, 好開心, 但我影cute主題?????
2. 青樺婚紗名店 (價錢: HK$20000左右)
Comment: 網上好評, 好高貴優雅復古, 但我影會唔會有d老土既感覺出左黎架?????
3. 蝴蝶•樹 (價錢: HK$20000左右)
Comment: 表姐影完, 景好靚, post得意, 妝化得好, 一直渴望的台灣婚紗相.
台中代表
1. 瑪莎LiLi數位婚紗聯盟 (價錢: HK$10000-16000左右)
Comment: 網路上好多好評, 一睇佢d相就有種 Mr Right既感覺, 唔通真係佢?
台南代表
1. 飛魚婚紗 (價錢: HK$10000左右)
Comment: 佢地既情景模式拍攝手法簡直一流, 可將婚紗相全輯用故事表達, 絕!!!
以上資料全經過好多唔同網頁, 唔同網友推介!!~~~
~ http://verywed.com/wedStreet/list.php
~ http://tw.myblog.yahoo.com/jw!Bn6_F3mLEQWmovel6Rgug3M-/article?mid=721
~ http://wedding.esdlife.com/home/chi/default.asp
突然有個新既計劃出現左, "係時侯啦......"男友話.
要準備結婚啦, 但點準備, 咩野都無, 錢又未儲夠, 屋又未有, 咁.....但係 "計劃" 始終要進行, 而且都唔可能一直齋等, 如果等唔到屋, 咪唯有出去租貴少少, 細少少個d啦. 但估唔到係佢一早都有呢個意欲, 只係仍有一點担心(好多問題), 所以直至宜家先提出.
佢知我好想去台灣影婚紗相,因我一早已成日lur 佢話:
"第時結婚相要好似邊個邊個咁去台灣影";
"佢地d相好靚, d景好靚, d化妝好靚";
"我一早都有呢個style既 idea啦, 佢地結先, 比人抄左";
"大陸個d好娘架";
"香港個d好唔抵, 比人屈".............
數十個以上既原因要去台灣. 再加上我第一次睇台灣既婚紗相, 係我表姐個輯, 嘩....嘩....嘩.....個時真係眼前一亮, 呢個情意結就係咁樣係幾年前一直開始跟住我到宜家啦.
而且, 我地既假期只有農曆新年, 咁如果要1,2年後結婚...咁咪要下年新年去影囉, 唔係邊有時間呀~~ 就係咁, 我就開始左我出年去台灣影婚紗相既資料搜集啦. 點解淨係 "我" 做資料搜集?? 因為男友的一句說話, 好感動呀 "你去搵資料啦, 我無所謂, 最緊要影得你靚, 你鍾意, 你覺得好就得啦, 最怕因為我的意見影響你, 第時睇番唔開心, 一生人一次, 就晒你啦".
由宜家開始, 我就要為我地來緊個1,2年既婚禮做準備啦!!
