經過一輪爭扎之後, 都係覺得book左場先會好d, 因為我唔同其他JM, 我個大日子係X’MAS, 之前睇過既每一個證婚場地都係要加價, 仲要最少加一千.
既然我可以講到伊甸園唔加價, 仲要比番EXPO個價我(即係減3百), 再加送結婚證書套比我, 咁都應該係最著數架啦. 都有諗過等唔等政府註冊處出左時間表, 睇下12月25日開唔開先, 但係仲要等好耐, 如果最後係唔開, 而伊甸園又比人book到full左, 咁點算, 所以最後當比錢買個保險, 而且又有想要既時間.
咁樣, 就造就左我要年半前book證婚場既決定啦!!! 當然, 各位JM, 如果你個日唔係咩野特別日子, 而且又多場地選擇既話, 係唔使咁早book既.
今日去左book場啦, 最後都係揀左HALL 1, 因為比較喜歡佢既樓底高度, 仲有佢既佈置. 不過仍要注意一下當日既背光問題, 因為聽人講HALL 1係下午時間係幾背光既, 唯有叫攝影師就一就啦.
我既big day係公眾假期, 仲要係聖誕節, 原來政府既婚姻註冊處係唔開架, 咁唯一既選擇, 只係有坊間既私營註冊場地或者係請律師證婚.
律師證婚就應該唔會考慮, 因為我唔會係d戶外場地證婚, 而且仲要用多一筆錢佈置, 租場, 宴客呀咁, 所以即係只有婚宴當晚係酒樓證婚, 但係……我夢想既簽字承諾終生幸福既地方唔係酒樓, 覺得唔夠莊嚴, 而且有時d賓客都唔想睇你證婚, 宣誓個刻d人都會睇下既, 但簽名同影相個時, d賓客真係好無聊, 唔知做咩好, 係度呆等, 所以唔想大家咁唔專心, 都係搵番坊間個d註冊場地算了.
唯一選擇:
由於我出門, 入門, 擺酒既地點都想係香港中上西環, 所以伊甸園既HALL1 同 HALL8變成係唯一既選擇, 仲要係聖誕節, 即係又要同人爭時間.
伊甸園(中環碼頭2號 &中環碼頭8號)
HALL 1 (中環2號碼頭)
外觀: 位處於2號碼頭1樓, 人流較少, 因船隻為來回珀麗灣至中環航線, 但不知怎樣, 地面上總是濕溚溚, 會否只因睇場日子為4月份春季, 還是整年都會係咁呢?
佈置: 優雅, 一入去有種grand既感覺
樓底: 頗高, 一定比HALL 8 高
整潔: 除室外地方之外, 室內環境非常滿意
座位: 椅套比較舊, 有少少變色
影相位佈置: 好好, 佈景美觀
空間: 一定足夠30-40人觀禮及拍照
HALL 8 (中環8號碼頭)
外觀: 位處於8號碼頭地下, 人流比2號碼頭多, 因船隻為來回紅磡至中環航線
佈置: 天花上圍了櫻花, 而且好似穿過一條櫻花隧道進入禮堂既感覺
樓底:比HALL 1 低
整潔: 除室外地方之外, 室內環境非常滿意
座位: 椅套新淨, 因剛換了, 不過可能1年後都係會好舊架啦
影相位佈置: 比HALL 1細, 佈景OK
空間: 一定足夠20-30人觀禮及拍照
搵到呢個MUA真係幾意外架, 因為佢其實之前係MASALILI度幫我既MUA, 本身佢之前都有人問佢會唔會考慮黎HK接job, 但佢都話唔考慮住. 而咁啱我係今年2月去影masa, 點知佢突然想轉換工作環境, 暫時想離開masa, 仲要我識左佢之後, 我地有交換contact, 我都問左佢好幾次可唔可以黎hk幫我, 而且我覺得佢既手法同態度都係非常之好, 令我好放心將個日交比佢.
經過幾次商議之後, 佢終於答應肯幫我呀, 而且我係咁早就已經約定佢啦, 所以佢都覺得可以. 真係太好lu…我覺得我比其他人來得幸運, 唔使左搵右搵, 左試右試, 仲要同其他JM去爭個d好同出名既MUA.
我big day既MUA就係AVITA啦, 如果係masa既fans都一定識佢架啦…HAHA.
BTW, 佢宜家除左會接新秘工作, 亦會幫紅豆婚紗做MUA(係紅豆係叫Amanda), 大家請多多支持...HAHA!!
http://www.wretch.cc/album/wedding1413
我既大日子就係交左比一個專程由台中遠度而來既新娘秘書. 佢亦係之前我pre-wedding時既MUA, 好難得佢可以答應飛來香港幫我, 而且價錢亦好合理, 比起HOLALA既joe yuan仲要抵 (已經計埋佢機票酒店添), 其實佢肯幫我亦係因為佢宜家自己接JOB.
不過係公開既blog頁度, 我現在唔太方便介紹佢太多, 如果大家都有興趣了解一下既, 請通知我加入blog友啦.
宜家比少少我既心水大家睇下, 當然佢仲有好多唔同既style, 唯有等有興趣既JM加入我blog或問我呢位MUA既資料先講啦...HAHA.
我既台中新秘(只限BLOG友)
今日好彩有芝士同小藍通知, JAN又再一次加價啦. 經過上一次小藍既婚禮之後, 其實我對JAN攝影手法同工作態度都有好好既評價. 不過佢既價錢比我原先既BUDGET高左少少, 所以一直都未肯馬上去決定用佢.
但係佢突然間使出一招加價, 真係令我措手不及, 因為JAN其實係我最後都無法搵到代替品時既最後選擇. 我其實好耐之前已經因為小藍既關係而睇佢既相, 都覺得係唔錯架. 只係當時仲未開始搵Wedding Day Photop, 所以一直未問JAN個期同Pricelist.
亦因為咁咁突然既事情發生左, 今日打左比JAN, 問左佢有無我個日既期, 同埋約左佢下星期出黎, 睇多d佢既相同Video, 當然最重要係同佢傾下計, 了解一下佢會唔會明我想要既野同feel. 如果ok既話, 都應該唔會再揀, 會confirm JAN架啦.
今日約左小車同美玉去尖沙咀既WG/EG公司踩場, 第1站Ballroom, 我同小車6點45分上到去, 全靠美玉Baby幫我地BOOK左時間咋, 因為上面已有另1位客人係度, 個度只可以同時接待2位客人. 一入到去, 職員提供左飲品,花茶比我地, 然後叫我地睇左相簿入面有無鍾意既款式, 可以抄低號碼, 再比實物我睇! 咁我都睇左幾件實物, 質地方面我唔係太識, 我主要係睇款式, 尤其係以租既價錢與款式作比較. 因為如果個件衫既款, 著起既時候唔似番個價,
咁其實可以係第2度租啦, 因為啲衫都唔值, 其次係要啲比較特別既款, 最好係獨家款.
好啦, 講到呢度, 都可以講番對Ballroom啲衫既感覺啦!
呢度既EG都有唔少獨家款, 第一眼已可以Feel到同其他既有唔同, 最重要係啲款既感覺唔會俗氣,
比到人有高貴既Feeling.
至於WG, 相比起EG, 真係無咁大驚喜, 可能係我比較鍾情Elegant X Vintage Crossover, 所以係好難揀, 而佢地LACE拖尾WG旣款式有限, 所以未揾到叮一聲既感覺.
另外價錢方面亦係一個比較重要既因素, 因為結婚呢個大Project已經要用好多錢, 所以每個項目既Budget Control 係要Keep得好好, 除非你有足夠既資源或無限既Support.
好啦, 講番呢度, 其實佢真係唔平, 因為我唔要佢地既WG, 即係只可Join佢地既2件EG Package, 差唔多成$4000, 即係要$2000租1件, 好似有啲貴, 而且要分開幾間公司租既話, 攞衫同還衫都唔方便, 加上我係要平安夜攞衫, 所以呢間係後備席既機會都幾高.
