MnM: -1週年(續)

正式踏入1年倒數階段, 之前成日個口都係度講仲有排啦, 成2年後既事, 到左今日, 終於都只係淨番1年啦, 時間真係過得好快, 個心開始有緊張啦, 黎緊呢段時間裡面, 我真係要加快速度先得啦, 因為我其實都真係仲有好多野未做, 亦有好多野想做, 我唔希望只係得個講字, 好想去實行, 希望可以做得到啦~

講番呢個-1既慶祝活動, 首先係平安夜既劉華concert, 個日我地雖然唔係同劉華一齊倒數聖誕, 不過都無損我地既雅興, 唯一唔高興既係我地前幾行既一對情侶, 成日企係度影相, 大佬呀, 得你地睇咩, 人地唔使睇啦, 自私到死, 仲要成日攬住, 要攬返屋企啦, 成幅牆咁, 真係比佢地激死, 我地前面個行既人都忍唔住發疲氣.

到左25號, 我地去左深圳既香格里拉食buffet, 野食係唔錯既, 款式亦多, 不過形式同香港既有少少唔同, 例如: 生蠔係限量既, 要排隊, 而且每人每次限4隻(香港係無限量); 即淥海鮮係要排隊係度等佢淥 (香港係攞住個牌返位等既). 之但係, 價錢方面, 深圳既又真係平一半wor, 而且啲野食都係新鮮既, 仲要包左果汁, 汽水, 啤酒任飲, 而紅酒/白酒都包左1杯. 原價係rmb288+15%, 係2星期前book有9折, 不過我係之前已經有個訂位紀錄, 同佢地講下, 叫佢地比番個9折我得唔得, 開頭都話唔得架, 點知埋單個時有比9折我wor…所以都係抵既, 宜家都係rmb250+15%之嘛. 跟住仲去揼左個靚骨, 不過都係好多人既~