永隆繡莊

究竟係傳統裙褂?? 定係潮褂好呢??

 

其實呢個問題我問左自己好多次, 由一開始見到好靚既潮褂開始, 由最初只有傳說中既潮褂之父COCOON, 到好多婚紗公司都照抄左款, 我都仲係好掙扎, 直至……….有一日, 我知道左傳統褂既意義之後, 我就對傳統褂產生左一種莫名其妙既感覺. 

 

各位姊妹如果一直心儀潮褂既, 請容許我講講傳統褂既意義, 講唔定, 之後你地都會對傳統褂產生情意結.  原來傳統褂係一個女人一生只可以穿一次既嫁衣, 就算再嫁都唔可以著, 當然有人梗係會話明星又點, model又點個d問題, 其實人地指一生只可以著一次係以你自己既結婚為準則, 即係話, 到你真正出嫁個日, 只可以著一次, 但係潮褂就無左呢個意義, 只係好似一件比較靚既衫咁, 意義已經唔同晒, 所以最後我都係決定著傳統褂, 我唔想錯過左我人生既一次機會. 

 

傳統褂亦有分好多種:

 

褂皇, 褂后…..指全件都係繡滿左唔同既金銀線, 衫身華麗, 充滿貴氣, 以前係要皇室貴族先可以著, 因為衫身既線係多到睇唔到紅色既衫身, 不滿會比較重.

 

大五福, 中五福, 小五福……以金銀線多少分大, 中, 小, 其中小五福是紅色比較多.

 

珠片褂…..全件衫都係釘滿珠片, 比較青春活潑, 但略嫌唔夠華貴.

 

而繡花方面都有好多種款, 衫袖亦有長短, 衫腳亦有平腳及波浪腳, 所以傳統褂其實都係有好多款式選擇.

 

另外, 我亦鍾情傳統褂店, 因為只有傳統褂店可以有傳統封褂既味道.  咩野係封褂呢? 封褂係指由你一開始決定租褂個時, 就要揀好左件褂, 之後佢地就唔會再出租, 直至你出閣完之後.  而你用之前, 佢地亦會先執好線頭, 線位, 令你件褂好好睇睇.  而價錢除左用款式計算之外, 褂既出租次數亦有影響, 如果裙褂出租次數越少, 咁件衫亦會越貴.  如果你唔鍾意揀人地著過既, 亦可以選擇造租既頭褂, 不過咁梗係最貴啦.

 

最後, 我都係揀左一件中五福, 而且價錢只係$780, 真係超值.