既然睇開有條癮, 今日又咁啱6:30pm就可以放工, 平時最少都7:00pm啦, 咁......不如去埋尖沙咀啦, 而且睇完都差不多可以定案, 心裡面有一百萬個藉口比自己, 叫自己去睇睇, 好啦, 去睇睇啦.
唔知係咪星期一, 好好彩, 上到去又係無咩人, 只係啱啱有pair人走, 咁同老闆娘講睇訂造男禮啦, 之前打過電話問過係$950一套全包(褸/褲/背心/呔), 佢好好人, 好nice咁比本相簿我睇, 又介紹邊d可以改番普通老西款, 又講解$950個款同有d會貴d既款, 我話想睇下d實物, 佢立即去攞掛係上面個d禮服比我睇, 跟住我仲問佢d背心同豬腸呔價錢, 佢又攞晒d款比我睇, 嘩..都好多色喎, $198 好抵囉, 返大陸買都要啦, 我就係要買呢d去台灣. 咁我問佢地d size點樣啦, 佢地通常按照現碼改, 所以都要帶男友一齊去. 款都ok既, 如果租可以考慮, 但如果訂造, 就要睇下你地要咩款, 好似我搵個d, 洋服店有既, 咁其實去番洋服店好d, 因全新訂造, 唔係用現碼改, 但如果花巧d, 咁呢個價錢都算平.
係呢個時候, 佢仲叫我睇下佢地d婚紗, 晚裝, 我同佢講 "我無咁快要租, 我只係出年2月去台灣影相, 要買男禮過去, 婚期仲未定架, 可能要2011架". 我以為佢會好似金都個d人, 一聽到有排, 就費時采你, 點知佢竟然話, 無所謂, 睇下先囉, 遲d都要睇架啦. 佢一路講一路好熱情咁攞d衫比我睇, 仲由個衫套度攞出黎逐件遂件介紹, 仲叫我拼上身度照下鏡添. 我仲話 "我都未開始去睇呢d, 覺得仲有排, 今次都係第1間睇自己婚紗既鋪咋, 之前淨係幫人睇".
當見到自己拼上件婚紗個刻, 唔知點解, 熱淚盈眶, 好感動, 可能因為之前一直只係陪朋友仔睇, 今次終於有種係為自己睇既感覺, 好多謝你老闆娘, 雖然明知我今日係攪攪振, 無幫襯, 仲咁熱情招待, 我會記住你, 當我揀好日子之後, 一定會再返黎睇你d衫架.
講開又講, 佢d婚紗真係幾好, 攞上手個感覺唔差, 起碼一定係白色同新, 無個種黃咁咁既feel, 佢話佢地d婚紗晚裝好多都係自己設計, 或參考雜誌款改良, 所以同mk款唔同. 而且數量唔算多, 每款1件起, 2件止. 自從有次個朋友仔結婚個日, 見到佢同人撞婚紗後, 成日都記住, 平日d衫撞都算啦, 我地又唔係明星, 邊有咁多獨一無二先, 但無理由, 婚禮地點咁多, 婚紗公司咁多, 樣樣野唔撞, 偏偏撞婚紗咁慘架, 會記一世架....
呢2件都有攞實物睇, 仲拼過上身, 好靚呀!第1件就係令我熱淚盈眶既婚紗啦.
沒有留言:
張貼留言