係表姐個blog度見到佢寫番佢結婚個時, 原來有"婚前抑鬱症", 仲要佢自己唔知, 所以copy 出黎比大家分享下, 可以去佢個web度睇睇添:
http://hk.myblog.yahoo.com/kimstyling@ymail.com/article?mid=254
結婚, 係人生既大事, 更人生入面一件好煩既事. 一個又緊張, 又開心, 又煩惱既心情會帶比我地既影響好大, 想同大家分享一下我自己結婚個時既心情, 亦想比大家一個少少既提醒.
其實未結婚之前我地已經一齊住左一段時間, 成日覺得結婚都係做一個儀式, 之後就好似平時咁生活. 點知決定結婚之後, 就係惡夢既開始…….
開始籌備既時候都無咩特別, 老公通常都係睇住條數, 我就做d後面既野. 首先就係我自己係信耶穌既, 好想係教堂行婚禮, 不過個時我老公又未信, 無得行教堂.....有少少遺憾啦. 到左book酒席, 因為我屋企同佢屋企相對都幾遠, 大家都有老人家, 咁要就邊家人呢?(唔好諗住中間位就ok, 太多野唔係我地可以控制到, 例如屋企人既堅持...)最後因為一個比較特別既因素, 都係就左我屋企個邊.
到婚紗啦, 本來有親戚想搵人設計一件娼紗比我, 不過我又覺得婚後要收埋件野都幾煩, 又唔會再著既, 都係推左. 而我自己一向鐘意A line既婚紗, 不過老公係都要我著有”卜卜”既婚紗….最後我都順左佢意, 不過到而家我都因為件婚紗唔係A line而覺得有少少遺憾.
跟住就要去租晚裝啦. 行完wedding expo. 睇中左一間, 佢地既style我好鐘意, 比左$500-試衫費就走去試la. 不過一著上身就知唔得, 著左上身之後就覺得d cutting好怪, 條腰係胸線下, 個度都唔係腰黎既, 仲要件件都係咁, (比個tips大家, 改衫其實會改既通常都係闊度同長度, 如果你有我遇到既情況, 就要睇睇個腰位有無預留放長, 同埋放長後條腰線會唔會好高, 因為佢地為求做生意, 係會咩都話得ka, 要小心呀.), 最後, 我唯有再揀過第2間, 不過之前個$500試妝費, 就只可以換一件原價只係$168-既內衣..…而諗住租晚妝既姊妹就真係要快手, 我個時睇中左一件香檳色既褀袍, 不過因為有人租左, 所以我只好夾硬搵過第二件. 又有d唔開心啦, 老公仲叫我唔駛咁追求完美.
租埋配襯既首飾, Book左化妝師同set頭既師傅, 就開始搵回禮既禮物, 我個時好興d閃閃介指, 不過有朋友公司既annual dinner就送左一舊會七彩閃既假冰粒, 心諗 : 就搵呢個啦. 不過搵左好耐都搵唔到; 到搵到個時, 又發現好貴好貴...最後都係買左閃閃介指….唉…又唔係心目中想要既野.
過左大半年, 係時候開始要做d細節野. 首先係要印帖, 排坐位, 為左呢d野, 我地又嘈左好多次, 有d人又唔可以同某d人坐; 邊個d親戚朋友要坐前d(唔係一人一半就得ka), daddy mummy既咩朋友又要坐前d…..係呢個時候, 自己既情緒起伏已經好大, 一來公司好忙又好多野做搞, 二來自己結婚又多野搞, 三來又要同自己娘家傾坐位既問題, 仲抽時間去做facial, 又要顧住自己有無肥到…..到開兄弟姊妹會既時候, 又要約黎約去先夾到個大家啱既時間, 又要自己寫流程(join左我地package既就唔駛咁煩啦, 我地係會provide家)à呢part好煩, 要計好晒所有時間, 步驟, 安排邊個負責咩野, 仲要有d人唔鐘意負責呢樣, 又唔鐘意負責個樣……好煩…..
到呢個時候, 我已經因為太煩, 成日”目訓”得唔好, 有好多野唔開心, 又同老公嘈過好多次交, 搞到好唔想結婚, 仲想同分手. 我已經去到同屋企人講唔結婚既地步. 個時好唔開心, 但係老公唔明, 朋友又唔明(可能我係最早結婚既), 屋企人又唔明, 又無人幫到手; 最後, daddy一句 : “但係派晒帖lawor….” 我就好似有d半推半就咁繼續行.
到結婚前一個月, 個人仲緊張, 好似咩做咩唔夠時間, 咩都唔夠好. 最唔想去做facial, 要用好多時間, 不過亦只有做facial個時, 我先”目訓”得好d….婚前3日去攞衫, d衫都仲啱著, 但係到結婚個日, d衫既經唔啱著, 原來壓力真係會令人瘦ka.
其實好多人都係咁, 尤其係女人, 因為又要返工, 又要煩結婚既野(女人會比男人緊張ka). 決定結婚後, 繁瑣既籌備工作就接踵而來. 女人容易比好多客觀既問題同情感起伏而搞到忐忑不安，心裡面就浮出千萬個問號：究意佢你唔係我應該嫁既人呢？會唔會去得太快呢？婚後生活又會點呢？同老爺奶奶住會點呢? 唔同佢地住又會點呢? 婚期愈近，心情就愈亂，呢d都是"婚前抑鬱症"既徵兆。女人天生多疑, 呢個係改變唔到的事實. 而好多時男人都唔係好理結婚細節既野, 女人又要顧呢樣又要顧個樣, 仲要keep好自己.......最重要係..d親人成曰都話無所謂, 最後唔啱心水又唔鐘意.......唔好以為結婚係兩個人嘅事，其實係兩個家族嘅事。
到左而家, 我結左婚3年啦. 回想返個時, 真係覺得好奇怪, 之後同d醫生朋友傾開, 大家都覺得我個時係有婚前抑鬱症既表徵.....如果大家有我以上既徵狀, 一定要搵人傾訴下, 自己亦要放開d, 人係無可能將所有野都做到完美, 尤其係呢類唔係自己可以控制晒既野. 好彩我個時無堅持唔結婚咋, 因為而家既婚姻生活好開心呀.
最後都祝大家婚姻甜蜜愉快.
- 留言者: Lok
- Email: lok10001@yahoo.com.hk
- 網址:
- 日期: 2009-08-02 12:06:00
本公司服務範圍：訂購各類電腦產品/文儀用品/嬰兒產品/婚禮用品/寵物產品 TEL : 34288488 / 95255012
努力一起共同生活吧....
- 留言者: 灝然
- Email: kb3for3@yahoo.com.hk
- 網址:
- 日期: 2009-08-01 12:01:00
其實婚後先至係戲肉!
沒有留言:
張貼留言